ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

*ಸತತ 4ನೆ ಜಯ

*ಸಂದೀಪ್ ಡಬಲ್ ಸ್ಟ್ರೈಕ್

ಹೊಸದಿಲ್ಲಿ, ಫೆ.22:ಪೆನಾಲ್ಟಿ ಕಾರ್ನರ್ ಸ್ಪೆಷಲಿಸ್ಟ್ ಸಂದೀಪ್ ಸಿಂಗ್ ಮತ್ತೊಮ್ಮೆ ಹೀರೊ ಆಗಿ ಹೊರಹೊಮ್ಮಿದ್ದಾರೆ. ಇಂದು ನಡೆದ ಪುರುಷರ ಒಲಿಂಪಿಕ್ ಹಾಕಿ ಅರ್ಹತಾ ಸುತ್ತಿನ ಪಂದ್ಯದಲ್ಲಿ ಸಂದೀಪ್ ಸಿಂಗ್ ಬಾರಿಸಿದ ಎರಡು ಗೋಲುಗಳ ನೆರವಿನಲ್ಲಿ ಭಾರತ ತಂಡ ಕೆನಡಾವನ್ನು 3-2 ಅಂತರದಿಂದ ಸದೆ ಬಡಿದಿದೆ.ಮೇಜರ್ ಧ್ಯಾನ್‌ಚಂದ್ ರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಭಾರತ ರೋಚಕ ಗೆಲುವು ಸಾಧಿಸುವ ಮೂಲಕ ತಾನಾಡಿರುವ 4 ಪಂದ್ಯಗಳಲ್ಲೂ ಗೆಲುವು ಸಾಧಿಸಿ 12ಅಂಕಗಳನ್ನು ಸಂಗ್ರಹಿಸಿ, ಅಂಕಪಟ್ಟಿಯಲ್ಲಿ ಅಗ್ರಸ್ಥಾನವನ್ನು ಕಾಯ್ದುಕೊಂಡಿದೆ.ಶುಕ್ರವಾರ ನಡೆಯಲಿರುವ ಅಂತಿಮ ಪಂದ್ಯದಲ್ಲಿ ಭಾರತ ಪೋಲೆಂಡ್‌ನ್ನು ಎದುರಿಸಲಿದೆ.

ಇಂದು ನಡೆದ ಕೊನೆಯ ಪಂದ್ಯದಲ್ಲಿ ಭಾರತಕ್ಕೆ ಶಿವೆಂದರ್ ಸಿಂಗ್ 26ನೆ ನಿಮಿಷದಲ್ಲಿ ಕೆನಡಾದ ಗೋಲು ಕೀಪರ್‌ನ ಕಣ್ಣು ತಪ್ಪಿಸಿ ತಂಡದ ಖಾತೆಗೆ ಮೊದಲ ಗೋಲು ದಾಖಲಿಸಿದರು. ಪ್ರಥಮಾರ್ಧದಲ್ಲಿ ಭಾರತ 1-0 ಮುನ್ನಡೆ ಸಾಧಿಸಿತ್ತು. ವಿರಾಮದ ಬಳಿಕ 40ನೆ ನಿಮಿಷದಲ್ಲಿ ಸಂದೀಪ್ ಸಿಂಗ್ ಪೆನಾಲ್ಟಿ ಕಾರ್ನರ್ ಮೂಲಕ ಗೋಲು ಕಬಳಿಸಿ ಭಾರತಕ್ಕೆ 2-0 ಮುನ್ನಡೆ ಸಾಧಿಸಲು ನೆರವಾದರು.

10 ನಿಮಿಷದ ಬಳಿಕ ಕೆನಡಾ ತಂಡದ ಪಿಯರ್ಸನ್ (50ನೆ ನಿಮಿಷ) ಗೋಲು ಸಂಪಾದಿಸಿದರು. 53ನೆ ನಿಮಿಷದಲ್ಲಿ ಟುಪ್ಪರ್ ಗೋಲು ಗಳಿಸಿ 2-2 ಸಮಬಲ ಸಾಧಿಸಿದರು. ಆದರೆ 61ನೆ ನಿಮಿಷದಲ್ಲಿ ಸಂದೀಪ್ ಸಿಂಗ್ ವಿಜಯದ ಗೋಲು ಬಾರಿಸಿ ತಂಡಕ್ಕೆ 3-2 ಮುನ್ನಡೆ ದೊರಕಿಸಿಕೊಟ್ಟರು. ಇದರೊಂದಿಗೆ ಭಾರತ ಕೆನಡಾವನ್ನು ಮಣಿಸಿ ಸತತ ನಾಲ್ಕು ಗೆಲುವಿನೊಂದಿಗೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದಿದೆ.

ಪೋಲೆಂಡ್, ಫ್ರಾನ್ಸ್‌ಗೆ ಜಯ:ಇಂದು ನಡೆದ ಮೊದಲ ಪಂದ್ಯದಲ್ಲಿ ಪೋಲೆಂಡ್ ತಂಡ ಇಟಲಿಯ ವಿರುದ್ಧ 11-3 ಅಂತರದಲ್ಲಿ ಭರ್ಜರಿ ಗೆಲುವು ಸಾಧಿಸಿತ್ತು.ಎರಡನೆ ಪಂದ್ಯದಲ್ಲಿ ಫ್ರಾನ್ಸ್ ತಂಡ ಇಟಲಿಯನ್ನು 3-0 ಅಂತರದಿಂದ ಸೋಲಿಸಿತ್ತು.